Ümumi
17-03-2022, 12:44
385
ADPU-da Hidayət Orucovun yaradıcılığına həsr olunmuş tədbir keçirilib
Mart ayının 16-da Filologiya fakültəsinin dekanı vəzifəsini icra edən Mahirə Hüseynovanın təşəbbüsü ilə Azərbaycan Dövlət Pedaqoji Universitetində (ADPU-da) şair, nasir, dramaturq, Əməkdar incəsənət xadimi, ictimai xadim Hidayət Orucovun yaradıcılığına həsr olunmuş "Gəncliyim gözümdə canlandı mənim" adlı tədbir keçirilib.
Daha sonra tələbə və müəllimlər Hidayət Orucova suallar ünvanlayıblar. O, tələbə və müəllimləri maraqlandıran suallara cavab verib, tədbirə görə ADPU-nun rektoru, tarix elmləri doktoru, professor Cəfər Cəfərova və başda professor Mahirə Hüseynova olmaqla Filologiya fakültəsinə təşəkkürünü bildirib.
TehsilForumu.Az xəbər verir ki, tədbiri ADPU-nun rektoru tarix elmləri doktoru, professor Cəfər Cəfərov açıq elan edərək Hidayət Orucovun Azərbaycan ədəbiyyatının, mədəniyyətinin inkişafında, Azərbaycan dövlətçiliyinin möhkəmləndirilməsində rolundan danışıb, ədəbi ictimaiyyət tərəfindən sevilən siyasi elita mühitində hörmət qazanan şəxsiyyət olduğunu vurğulayıb. Hidayət Orucovun ictimai fəaliyyəti ilə yanaşı, bədii yaradıcılığının, xüsusilə “Burdan min atlı keçdi”, “İrəvanda xal qalmadı” əsərlərinin, şeirlərinin, dramaturgiyasının müasir Azərbaycan ədəbiyyatının əvəzsiz nümunələri olduğunu qeyd edib, yaradıcılığındakı vətənpərvərlik ruhundan bəhs edib.
Tədbirin davamında söz ADPU-nun Ədəbiyyatın tədrisi texnologiyası kafedrasının professoru, filologiya elmləri doktoru Yaqub Babayevə verilib. Yaqub Babayev Hidayət Orucovun zəngin bədii irsi haqqında əhatəli çıxış edib.
Tədbirin bədii hissəsində Filologiya fakültəsinin nəzdində fəaliyyət göstərən "Meh" ədəbi dərnəyinin üzvləri çıxış ediblər. Onlar Hidayət Orucov yaradıcılığına aid bədii kompozisiya ilə çıxış edib, şeirlərini səsləndirib, "Bu dünyanın adamları" dramından bir hissəni tamaşaya qoyublar.
Sonra Azərbaycanın görkəmli elm və ictimai xadimlərinin Hidayət Orucov haqqındakı fikirlərinə həsr edilmiş video çarx nümayiş olunub.
Hidayət Orucovun sözlərinə bəstələnən "Məktub" mahnısının ifa edilməsi tədbir iştirakçılarında xoş ovqat yaradıb.
"Meh" ədəbi dərnəyinin rəssamı Günel Bağırovanın çəkdiyi portreti Hidayət Orucova hədiyyə verməsi də maraqla qarşılanıb.
Tədbirin sonunda ADPU-nun Beynəlxalq əlaqələr üzrə prorektoru, Filologiya fakültəsinin dekanı vəzifəsini icra edən Mahirə Hüseynova çıxış edərək Hidayət Orucov poeziyasında müasir insan həyatının, yaşamının xoş ovqatından, şairin lirik “Mən”inin əxz etdiyi mənəvi dəyərlər işığından, şeirləri ilə müasir poeziyaya yeni ovqat aşılamasından söz açıb, Filologiya fakültəsinin dəvətini qəbul edərək görüşə gəldiyinə görə Hidayət Orucova minnətdarlığını bildirib.
Şərhlər