Gənc tədqiqatçılar elektron mikroskopiyanın əsasları barədə məlumatlandırılıb

TehsilForumu.Az xəbər verir ki, seminarda BDU-nun Tədqiqat, İnkişaf və İnnovasiyalar üzrə Mükəmməllik Mərkəzinin direktor müavini Zöhrab Ağamalıyev “JEOL JSM7600F SEM-in imkanları və nümunə hazırlığı” mövzusunda çıxış edərək gənc tədqiqatçıları elektron mikroskopiyanın əsasları, iş prinsipi və əsas elementləri barədə məlumatlandırıb.  

O, BDU-nun Nanoaraşdırmalar Elmi-Tədqiqat Laboratoriyasında quraşdırılan Yaponiya istehsalı olan JEOL JSM7600F elektron mikroskopunun imkanları haqqında məlumat verib, müxtəlif növ nümunələrin tədqiqində qarşıya çıxan problemləri sadalayıb. Laboratoriyada aparılan elmi-tədqiqat işlərinin və onların əsasında çəkilən təsvirlərin misalında bu tədqiqat üsulunun geniş imkanlarını göstərib, nümunə hazırlığının düzgün aparılmasının vacibliyindən danışıb.  

Seminar interaktiv formada davam edib, iştirakçıların sualları cavablandırılıb.  

BDU-nun Texnologiyaların transferi və innovasiyalar şöbəsinin təşkilatçılığı ilə magistrant və gənc tədqiqatçıların seminarları davamlı şəkildə aparılacaq.